నేషనల్ హైవేలపై మృత్యుఘోష ఆగేదెప్పుడు? అధికారుల బస్సు యాత్ర కేవలం ఒక ప్రహసనమేనా? 40 రోజులు.. 50 మంది అధికారులు.. 28 బ్లాక్ స్పాట్లు.. కానీ క్షేత్రస్థాయిలో మారింది మాత్రం శూన్యం! జాతీయ రహదారుల ప్రక్షాళనపై అధికారుల వైఫల్యాన్ని వెలుగులోకి తెస్తోంది మా ప్రత్యేక కథనం.
(విజువల్: జాతీయ రహదారిపై ట్రాఫిక్ జామ్, రోడ్డు ఆక్రమణలు, ప్రమాదాల దృశ్యాలు)
జాతీయ రహదారులపై ప్రమాదాలను అరికడతామంటూ అధికారులు ఆర్భాటంగా ‘బ్లాక్ స్పాట్ల పరిశీలన బస్సు యాత్ర’ చేపట్టారు. కేతనకొండ నుంచి ఎనికేపాడు వరకు ఉన్న ప్రమాదకర ప్రాంతాలను ప్రక్షాళన చేస్తామని హామీలు గుప్పించారు. సరిగ్గా 40 రోజుల కిందట కలెక్టర్ లక్ష్మీశ, సీపీ రాజశేఖరబాబుతో పాటు 12 శాఖలకు చెందిన 50 మంది ఉన్నతాధికారుల బృందం క్షేత్రస్థాయిలో పర్యటించింది. రోడ్ల మీద ఆక్రమణలు తొలగిస్తాం.. స్పీడ్ బ్రేకర్లు వేస్తాం.. పసుపు రంగు మార్కింగ్తో అప్రమత్తం చేస్తామంటూ పెద్ద పెద్ద మాటలు చెప్పారు. కానీ నేడు పరిస్థితి చూస్తే ‘అధికారుల మాటలు కోటలు దాటుతున్నాయి.. పనులు మాత్రం గడప దాటడం లేదు’ అన్న చందంగా మారింది.
(విజువల్: రోడ్డు పక్కన ఉన్న హోటళ్లు, దాబాలు మరియు అడ్డదిడ్డంగా ఉన్న వాహనాలు)
ఈనాడు బృందం క్షేత్రస్థాయిలో పరిశీలించగా.. అధికారుల వైఫల్యాలు వెక్కిరిస్తున్నాయి. ఇబ్రహీంపట్నం మండలంలోని కేతనకొండ, మూలపాడు, గుంటుపల్లి, కనకదుర్గ వారధి వరకు ఎక్కడా ఆక్రమణల తొలగింపు జాడ కనిపించలేదు. ఇబ్రహీంపట్నం రింగ్లో నామమాత్రంగా పనులు చేసిన అధికారులు, మిగిలిన ప్రాంతాలను గాలికొదిలేశారు. హైవే అంచు వరకు వెలిసిన హోటళ్లు, దాబాలు, మెకానిక్ షాపులు యథేచ్ఛగా సాగుతున్నాయి. దుకాణాలకు వచ్చే వాహనాలను రోడ్డు మీదే అడ్డదిడ్డంగా నిలపడంతో.. వేగంగా వచ్చే వాహనాలు ప్రమాదాలకు గురవుతున్నాయి.
(విజువల్: అంతర్గత రోడ్ల నుంచి హైవేలోకి ప్రవేశించే ప్రమాదకర మలుపులు)
అంతర్గత రోడ్ల నుంచి జాతీయ రహదారిలోకి వచ్చే వాహనాలను నియంత్రించేందుకు వేగ నియంత్రికలు ఏర్పాటు చేస్తామని అధికారులు చెప్పారు. కానీ ఆచరణలో అవి ఎక్కడా కనిపించడం లేదు. ప్రమాదకర ప్రాంతం అని గుర్తించేలా పసుపు రంగు మార్కింగ్ చేస్తామన్న హామీ.. హామీగానే మిగిలిపోయింది. సూచిక బోర్డులు, అక్కడక్కడా సిబ్బందిని ఉంచడం తప్ప.. శాశ్వత పరిష్కారం వైపు అధికారులు అడుగులు వేయలేదు. నగరంలో ఫుట్పాత్ల ఆక్రమణతో ట్రాఫిక్ స్తంభించిపోతుంటే, నిమ్మకు నీరెత్తినట్లు వ్యవహరిస్తున్న యంత్రాంగం తీరుపై సర్వత్రా విమర్శలు వ్యక్తమవుతున్నాయి. అధికారుల బస్సు యాత్ర ఫోటోలకు, వార్తలకు మాత్రమే పరిమితమైందా? సామాన్యుల ప్రాణాలకు రక్షణ కల్పించేదెప్పుడు? అని జనం ప్రశ్నిస్తున్నారు.
