కృష్ణా, ఏలూరు జిల్లాల అన్నదాతలకు ఒక తీపి కబురు! లక్ష ఎకరాల సాగునీటి కష్టాలకు ఇక మోక్షం లభించబోతోంది. గత ఐదేళ్లుగా నిర్లక్ష్యానికి గురై, గుర్రపుడెక్కతో నిండిపోయిన ఏలూరు కాల్వకు పూర్వవైభవం తెచ్చేందుకు కూటమి ప్రభుత్వం నడుం బిగించింది. ఐదేళ్ల నిరీక్షణకు తెరదించుతూ రూ. 5.30 కోట్లతో చేపడుతున్న ఈ భారీ కార్యచరణపై మా ప్రత్యేక కథనం.
(విజువల్: బుడమేరు, ఏలూరు కాల్వలోని గుర్రపుడెక్క మరియు తూడు దృశ్యాలు)
రెండు జిల్లాల పరిధిలో లక్ష పైచిలుకు ఎకరాలకు సాగు నీరందించే ఏలూరు కాల్వ, దానికి అనుసంధానంగా ఉన్న బ్రాంచి కాల్వల పరిస్థితి గత ఐదేళ్లుగా అత్యంత దారుణంగా తయారైంది. గత ప్రభుత్వం హయాంలో నిర్వహణ పనులు కేవలం కాగితాలకే పరిమితం కావడంతో, కాల్వలన్నీ తూడు, గుర్రపుడెక్కతో నిండిపోయాయి. దీనివల్ల నీటి ప్రవాహానికి ఆటంకం ఏర్పడి, శివారు భూములకు చుక్క నీరు అందక రైతులు తీవ్ర ఇబ్బందులు పడ్డారు. అనేక చోట్ల కాల్వలకు గండ్లు పడటం వల్ల విలువైన నీరు వృథాగా పోతూ, ఆయుకట్టు రైతులకు అన్యాయం జరిగింది.
అయితే, రాష్ట్రంలో కూటమి ప్రభుత్వం అధికారంలోకి వచ్చిన తర్వాత పరిస్థితులు మారుతున్నాయి. గత ఏడాది కొంతమేర పనులు చేపట్టిన ప్రభుత్వం, ఈ ఏడాది ఏలూరు కాల్వ ఆధునీకరణపై ప్రత్యేక దృష్టి సారించింది. ముఖ్యంగా గన్నవరం, ఉంగుటూరు, బాపులపాడు, పెదపాడు మండలాల పరిధిలో ఉన్న డెల్టా ప్రాంతాలకు తాగు, సాగు నీరందించేందుకు సమగ్ర ప్రణాళిక సిద్ధం చేసింది. ఈ క్రమంలోనే రూ. 5.30 కోట్ల భారీ అంచనా వ్యయంతో పనులను ప్రారంభించారు.
(విజువల్: జేసీబీలతో కాల్వల పూడికతీత పనులు, అధికారులు పరిశీలిస్తున్న దృశ్యాలు)
కీలకమైన బుద్ధవరం, కేసరపల్లి, ఉంగుటూరు, పొణుకుమాడు, వీరవల్లి, చిరివాడ, కాకులపాడు, కానుమోలు, ఆరుగొలను, గోగుంట వంటి 11 బ్రాంచి కాల్వల నిర్వహణ లోపాలను ఈ పనుల ద్వారా సరిచేయనున్నారు. గత ఏడాది కేవలం 1,200 మీటర్ల మేర 90 లక్షలతో పనులు జరగ్గా, ఈసారి మొత్తం వ్యవస్థను ప్రక్షాళన చేయాలని ప్రభుత్వం నిర్ణయించింది. కేవలం కాల్వలు శుభ్రం చేయడమే కాకుండా, బుడమేరుతో పాటు కేసరపల్లి, పెదఆవుటపల్లి, ఆత్కూరు, వన్నేరు వంటి మీడియం, మైనర్ డ్రెయిన్ల బాగుజేత పనులు కూడా ఈ జాబితాలో చేర్చారు.
ప్రస్తుతం పనులు శరవేగంగా జరుగుతున్నాయి. గుర్రపుడెక్కను తొలగించడం, పొదలను నరికివేయడం, అవసరమైన చోట ట్రాక్టర్లతో పూడిక తీయడం వంటి కార్యక్రమాలు ముమ్మరంగా సాగుతున్నాయి. అయితే, కాలం మించిపోతోంది. మరో రెండు వారాల్లోపు అంటే.. ఈ నెలాఖరుకల్లా పనులన్నీ పూర్తి చేయాల్సి ఉంది. అధికారులు నిర్లక్ష్యం వీడి, నాణ్యతతో కూడిన పనులు పూర్తి చేస్తేనే.. రాబోయే ఖరీఫ్ సీజన్లో రైతులకు సాగునీటి కష్టాలు ఉండవు. లక్ష ఎకరాల పచ్చని పంటల కోసం యంత్రాంగం శక్తివంచన లేకుండా పనిచేయాల్సిన సమయం ఇది.
