గుంటూరు నగర అభివృద్ధి కోసం ప్రభుత్వం వందల కోట్లు కుమ్మరిస్తోంది. డ్రెయిన్లు, రోడ్లు.. ఇలా నగరం రూపురేఖలు మార్చేందుకు 600 కోట్ల రూపాయలతో పనులు వేగంగా జరుగుతున్నాయి. కానీ, ఈ అభివృద్ధి వెనుక ఒక చీకటి కోణం దాగి ఉంది. కాంట్రాక్టర్ల కాసుల కక్కుర్తికి పసిప్రాయం బలైపోతోంది. బుక్స్ పట్టుకోవాల్సిన చేతులు.. బురద తీస్తున్నాయి. అవును, గుంటూరు నగరంలో బాల్యం బురదపాలవుతోంది. అధికారులు నిమ్మకు నీరెత్తినట్లు వ్యవహరిస్తుంటే, గుత్తేదారులు చట్టాలను తుంగలో తొక్కుతున్నారు. నేటి మన స్పెషల్ ఇన్వెస్టిగేటివ్ రిపోర్ట్.. “అభివృద్ధి ముసుగులో బాల్యం బలి!”
గుంటూరు నగర ప్రజలకు మెరుగైన వసతులు కల్పించేందుకు ప్రభుత్వం ప్రతిష్ఠాత్మకంగా రూ.600 కోట్ల భారీ బడ్జెట్తో డ్రెయిన్లు, సీసీ రోడ్ల నిర్మాణ పనులను చేపట్టింది. నగరం నలుమూలలా జేసీబీలు, కార్మికులు పనిలో నిమగ్నమై ఉన్నారు. అయితే, ఇక్కడే నిబంధనలు గాలికి వదిలేస్తున్నారు కొందరు గుత్తేదారులు. నిబంధనల ప్రకారం భారీ నిర్మాణ పనుల్లో నైపుణ్యం కలిగిన పెద్దలే ఉండాలి. కానీ, గుంటూరులో మాత్రం చిన్నపిల్లలతో పనులు చేయిస్తూ చట్టాలను బేఖాతరు చేస్తున్నారు.గత రెండు నెలల వ్యవధిలోనే నగరంలో రెండు ప్రధాన ప్రాంతాల్లో బాలకార్మికులతో పనులు చేయిస్తున్న ఉదంతాలు బహిర్గతమయ్యాయి. మొదట సంజీవయ్యనగర్ రైల్వే గేటు నుంచి నెహ్రూనగర్ రైల్వేగేటు వరకు జరుగుతున్న కాలువ పూడికతీతలో ఓ పసివాడు కనిపించాడు. వ్యర్థాలు, విషపూరితమైన బురద తొలగించే పనుల్లో ఆ బాలుడిని వినియోగించడం చూసి నగరవాసులు విస్తుపోయారు. ఆ ఘటనపై తీవ్ర కలకలం రేగడంతో అధికారులు స్పందిస్తారని అందరూ ఆశించారు. కానీ, ఆ ఉదంతం మరువకముందే.. రెండ్రోజుల క్రితం ఏటీ అగ్రహారం ఐదోలైనులో మరో దారుణం వెలుగు చూసింది. డ్రెయినేజీ నిర్మాణ పనుల్లో మరో చిన్నారి పనులు చేస్తూ కెమెరా కంటికి చిక్కాడు. ఇవి కేవలం వెలుగులోకి వచ్చిన మచ్చుతునకలు మాత్రమే. ఇలా నగరం అంతటా ఎందరో చిన్నారులు కనిపించని రీతిలో బురద పనుల్లో నలిగిపోతున్నారు.నగరపాలక సంస్థ కమిషనర్ ఆదేశాలు కేవలం కాగితాలకే పరిమితమవుతున్నాయా అన్న అనుమానాలు వ్యక్తమవుతున్నాయి. సంజీవయ్యనగర్ ఘటన తర్వాత కమిషనర్ గారు ఇంజినీరింగ్ అధికారులను హెచ్చరించారు. క్షేత్రస్థాయిలో పర్యవేక్షణ ఉండాలని, బాలకార్మికులను వాడే గుత్తేదారులపై కఠిన చర్యలు తీసుకోవాలని స్పష్టం చేశారు. కానీ, ఏటీ అగ్రహారం ఘటన కమిషనర్ ఆదేశాలను అధికారులు ఎంత సీరియస్గా తీసుకుంటున్నారో స్పష్టం చేస్తోంది. అధికారులు ఏసీ గదులకే పరిమితమై, క్షేత్రస్థాయిలో జరుగుతున్న చట్టవిరుద్ధ పనులను గాలికొదిలేశారా?బాల కార్మిక చట్టాల ప్రకారం 14 ఏళ్లలోపు పిల్లలతో ఎలాంటి పనులు చేయించినా అది తీవ్రమైన నేరం. అందులోనూ ప్రాణహాని ఉండే డ్రెయినేజీ పనులు, లోతైన కాలువ పూడికతీత పనుల్లో వారిని దించడం ఎంతవరకు సమంజసం? ప్రశ్నిస్తే గుత్తేదారుల నుంచి పొంతనలేని సమాధానాలు వస్తున్నాయి. 600 కోట్ల అభివృద్ధి పనులంటే, అందులో చిన్నారుల రక్తం, కష్టం కూడా ఉండాలా? ప్రభుత్వం స్పందించాలి. కేవలం హెచ్చరికలు సరిపోవు. నిబంధనలు ఉల్లంఘించే గుత్తేదారుల లైసెన్సులను రద్దు చేయాలి. పర్యవేక్షణలో విఫలమైన అధికారులపై చర్యలు తీసుకోవాలి. లేదంటే, ఈ అభివృద్ధి గుంటూరు నగరానికి గర్వకారణం కాదు.. అవమానంగా మారుతుంది.
