అభివృద్ధి అంటే అద్దంలాంటి రోడ్లు వేయడమా.. లేక ఉన్న రోడ్లను తవ్వేసి ప్రజల ప్రాణాలతో చెలగాటం ఆడటమా? జిల్లాలో ఆర్అండ్బీ అధికారుల తీరు ఇప్పుడు ఇదే ప్రశ్నను లేవనెత్తుతోంది. నిధులు మంజూరయ్యాయి.. టెండర్లు ఖరారయ్యాయి.. తీరా పనులు మొదలుపెట్టాక గుత్తేదారులు చేతులెత్తేశారు. తారు ధర పెరిగిందని పనులు ఆపేసి, ప్రజలను కంకర రోడ్ల మీద నరకం చూడమని వదిలేశారు. దీనిపై మా ప్రత్యేక కథనం!
(విజువల్: కంకర తేలిన రోడ్లు, వాహనదారులు పడుతున్న ఇబ్బందులు)
జిల్లా వ్యాప్తంగా రోడ్ల మరమ్మతుల కోసం ఎదురుచూస్తున్న ప్రజలకు ప్రభుత్వం తీపి కబురు చెప్పి రెండు నెలలు కావస్తోంది. సుమారు 82 ఆర్అండ్బీ రోడ్ల రూపురేఖలు మార్చేందుకు 36 కోట్ల భారీ నిధులను కేటాయించింది. గత నెలలోనే వీటికి సంబంధించిన టెండర్ల ప్రక్రియ కూడా అత్యంత వేగంగా పూర్తయ్యింది. ఇక రోడ్లన్నీ మెరిసిపోతాయని జిల్లా వాసులు ఆశపడ్డారు. కానీ ఆ ఆశలు అడియాశలయ్యాయి.
కాంట్రాక్టర్లు పనులైతే మొదలుపెట్టారు.. కానీ అది ప్రజలకు ఉపయోగపడటానికి కాదు, వారిని మరింత ఇబ్బందుల్లోకి నెట్టడానికి అన్నట్లుగా తయారైంది. ప్రధాన రహదారుల్లో ఉన్న పాత తారు పొరను మెషీన్లతో తొలిగించి, పెద్ద పెద్ద కంకర రాళ్లను పోసి వదిలేశారు. రోడ్డు బాగున్నప్పుడు ప్రయాణం సాఫీగా సాగేది, కానీ ఇప్పుడు పరిస్థితి దారుణంగా మారింది. తవ్వేసిన రోడ్ల మీద వాహనాలు నడపడం సర్కస్ ఫీట్లు చేయడమే అవుతోంది.
(విజువల్: పక్కన ఆగిపోయిన రోడ్ల పనుల యంత్రాలు)
ఈ జాప్యానికి కారణం ఏమిటని ఆరా తీస్తే.. గుత్తేదారుల నుంచి విస్తుపోయే సమాధానం వస్తోంది. ఇటీవల మార్కెట్లో తారు ధరలు అమాంతం పెరిగాయట! దాదాపు రెండింతలు ధర పెరగడంతో, పాత టెండర్ రేట్ల ప్రకారం పనులు చేస్తే తమకు భారీ నష్టం వస్తుందని గుత్తేదారులు మొండికేస్తున్నారు. ప్రభుత్వం తమకు అదనపు నిధులు కేటాయించే వరకు లేదా ధరలు తగ్గే వరకు పనులు ముందుకు సాగవని భీష్మించుకుని కూర్చున్నారు.
కానీ ఇక్కడ ప్రశ్నించాల్సింది ఏమిటంటే.. ధరలు పెరుగుతాయని ముందే ఊహించలేదా? ఒకవేళ పనులు చేయలేనప్పుడు ఉన్న రోడ్డును ఎందుకు తవ్వేశారు? ఇప్పుడు ఆ కంకర రోడ్ల మీద ద్విచక్ర వాహనాలు వెళ్తుంటే టైర్లు స్లిప్ అవుతున్నాయి. ఆటోలు, కార్లు కంకర రాళ్లకు దెబ్బతింటున్నాయి. దీనికి తోడు అకాల వర్షాలు కురిస్తే పరిస్థితి మరీ ఘోరం. ఆ గుంతల్లో నీరు చేరి ఎక్కడ రోడ్డు ఉందో, ఎక్కడ కాలువ ఉందో తెలియని పరిస్థితి ఏర్పడుతోంది. ముఖ్యంగా రాత్రి వేళల్లో ఈ దారుల్లో ప్రయాణించడం ప్రాణాలకు ముప్పుగా మారుతోంది.
అధికారులు మాత్రం “చూస్తున్నాం.. మాట్లాడుతున్నాం” అంటూ కాలయాపన చేస్తున్నారు. 36 కోట్ల ప్రజా ధనం కాగితాల మీద ఖర్చవుతోంది తప్ప, క్షేత్రస్థాయిలో ప్రయాణికులకు మాత్రం కష్టాలు తప్పడం లేదు. జిల్లా యంత్రాంగం వెంటనే స్పందించి గుత్తేదారులపై కఠిన చర్యలు తీసుకోవాలని, లేదా ప్రత్యామ్నాయ మార్గాల ద్వారా త్వరగా రోడ్లు వేయించాలని జనం డిమాండ్ చేస్తున్నారు. లేదంటే ఈ కంకర రోడ్లే వచ్చే ఎన్నికల్లో పాలకులకు గట్టి పాఠం చెబుతాయని హెచ్చరిస్తున్నారు
